موسیقی نشئه سی مین سوگیلی جانانه دگر

اثر ناله نی عارف ایچون جانه دگر

موسیقی اھلینه انصاف ایله قیمت قویماق

لحن داود ایله مین تخت سلیمانه دگر

بیخبرلر نه بیلیر لھجه خواننده نه دیر

اھل حال اولسا، بو سؤز قدرده میلیونه دگر

پرده غم داغیلیر تاره دگنده مضراب

طره دلبره ھردم نئجه کی شانه دگر

موسیقیله اولار ھر خسته یه عالمده علاج

بو طبابت نئچه مین چاره لقمانه دگر

بیزه بو علم حرام اولموشایدی کئچمیشده

یعنی شیطان ایشی دیر، رخنه سی ایمانه دگر

یاشاشین قرمزی شھرتلی وطن قانونی

بوسخاوت نئچه مین حاتم دورانه دگر

قیلدی ھر یئرده بنا موسیقی مکتب لرینی

نغمه نین فایده سی ایندی ھر انسانه دگر

خلقیمیز موسیقی علمین اوخویور مینلرجه

ئولکه میزچون بو شرف مھر درخشانه دگر

موسیقیله منی دفن ایله سه لر واحد اگر

قبریمین تورپاغی مین روضه رضوانه دگر